會計師血淚史 -- 收工在太陽升起時
Big4之一安永「何小姐」事件，令會計界人士食盡花生。不過花生背後，盡是一個又一個打工仔血淚史。今次會計師悲歌系列，我哋由會計界人士度收集返來，不過相信只係冰山一角。
經典血淚史１：
一般如果big4出一單唔係特別細Job，一條Team基本會有4個人。但基於呢一行turnover好快，好多人會喺peak season走哂，可能走淨兩個人，咁呢兩個人就要搞返同一隻上市公司嘅Audit，但出Job時間係冇因此延長到，結果大家就焗住通頂。
假如隻Job有啲難度，就會放多個初級經理落去，不過由於Manager嘅鐘係貴好多。所以啲細嘅，就算督鐘督唔多（督鐘即係填Time Sheet，紀錄返放工時間），基於隻Job嘅Recovery（即係要回本），所以班細可能分分鐘連OT都charge唔到。
即係你日日做到朝早三、四點，都係同亞視一樣，有汗出冇糧出，業內稱之為「食鐘」，食者，消失也。事實係，督足鐘呢種情況，只有喺柏拉圖理想國入面先見到。
當然亦有啲有良心少少嘅Manager，會留番啲鐘俾同事Charge OT。不過做好人係有代價，事關去到開會時，佢就會俾人質：點解你啲Capacity咁低。
唔好以為升咗做Manager就可以有好日子過，事實係可能仲wok（行內術語，好忙咁解）！如果你係做得嘢嘅Manager，一有大單野，例如IPO或者其他special，總會有老闆拍下膊頭，你就要死左入去做。有啲黑仔嘅Manager，可能幾隻大野喺手，慘在遇到個唔做嘢嘅Senior Manager，嘢又唔做，但係督晒隻Job嘅鐘，分得少少俾個Manager督，結果個Manager又俾人問：點解你啲Capacity咁低。
又有啲情況係，遇著隻Job無咩錢，佢就會逼人零晨12點前收工，逼你坐地鐵，唔使Claim的士錢。問題係，你啲未完成嘅工作就要你拎番屋企做到清晨，然後聽朝8點準時交Working（即係交功課啦）
經典血淚史２：
喺2012年嘅1月份，同樣係Big4嘅德勤（DTT），有Partner（合伙人）喺Office門口貼出張memo，重申一次「公司上班時間係8點半，唔係9點、9點半、10點或10點半」明寸班細返工遲到。
話說一般嚟講，Audit嘅peak season，11點前放工叫「早放」，零晨12點至3點叫「正常」，清晨4點後甚至通頂，你可以話自己好Wok（即係忙咁解）。你可以話食得咸魚抵得渴，但面對管理層吓吓當老奉，扯火都係人之常情。如果你前一晚收5點半，朝早準時8點半返到，即係你只有3粒鐘返屋企連休息。
於是有位同事就忍唔住，貼多張Memo，回敬返呢位Partner，「我哋嘅收工時間係下午5點半，唔係零晨12點、朝早3點或6點。」下款係「謙卑的僕人」。
經典血淚史３：
做 Audit嘅，一般都係要一路返工一路考試，咁考試前請No Pay Leave亦係大家慣常做法。咁放假時，大家當然係溫書啦，但個Auditor放完假返工，竟然俾老細鏟到上天，罪名係「唔覆Email」。如事者，呢位小小嘅Auditor，之後每次考試假，唔止要check email、仲要清Q（Queries，即係答老細嘅問題）
最慘係，呢位Auditor可能唔好彩，每次考final前都要出trip，結果要銷假。當本身都已經唔係請好多no pay（大佬無錢呀……），仲要做No Pay工作，已唔係好夠時間溫，再加埋銷假，根本搞唔掂。
後來呢位小小嘅Auditor頂唔住，決定破釜沈舟resign去考試，咁就Pass左。
經典血淚史４：
Peak Season為埋數，做到氣咳係必然，但當Partner喺班細做到散晒時，仲提出啲無謂要求，你都咪話唔火滾。有部份Auditor會稱之為「Partner強逼症」。
當一個Auditor做到朝早4、5點時，完成一個二百幾頁嘅File，正當以為交俾Partner就可以帶著疲憊嘅身軀，快快樂樂回家去時，呢位Partner竟然要求你將呢二百幾頁嘅File，每張紙個打窿位，貼上一個小小嘅水泡貼紙。
除左係貼水泡，仲有係釘書釘嘅方向要全部一致（例如全部打橫釘），同埋啲紙入完File，係唔可以有任何一張凸出黎，要好似D書咁要平。唔好忘記，好多時唔係得A4紙，仲有啲係A3嘅文件，你一定要摺到好齊唔係唔收貨。
又或當你Peak Season時，會有Partner行出嚟，命令班細嘅要執乾淨枱面先可以收工。你要知Peak Season時文件多到堆積如山，叫你執枱就等如叫你移走座山。好啦，等你朝早5點執好後收工，9點幾10點返到公司，請再拎返座山出嚟。
所以有時本來個客好哋哋冇乜野，啲料又齊，人又快手，但遇著麻煩嘅Manager或Partner，就令隻job由唔Wok都變到好Wok。（Wok，行內術語，好忙咁解）
經典血淚史５：
Audit嘅生態係好得意，越做得嘢嘅人就越俾人Wok，佢哋嘅Booking會好Full，不論咩Grade，都係。咁問題就來啦，就係Job疊Job。
好多時，唔係話你完咗一單Job嘅Booking，就完全唔使理，好多嘢都要繼續Follow，例如清Q（Queries，即係答老細嘅問題)同Account，但與此同時，你又要做新Job嘅Planning。
如果本身個人唔算好標青，你會有idle時間，就可以趁idle執。不過，你越做得嘢，你booking就越full。於是高grade又做得嘅Auditor，同一時間3至5隻job係常態。
唔好忘記，呢位Auditor會係12點打後先收得工，但收工後就要做上述嘅工作，結果做到5點。
當然，你可以話嫌辛苦咪唔好做囉！結果，當啲做得嘢嘅同事，佢哋Wok到盡，就會頂唔順決定「撳掣」，撳掣，唔撈也。
然後啲Job，就會推俾一啲都係好Wok（忙）但未「撳掣」嘅同事，如是者形成一個惡性循環。
Source:
http://hk.apple.nextmedia.com -- 倪敏慧
